8 mil mihugop kang Noynoy

CEBU, Philippines - Mga walo ka libo ka mga tawo, apil na ang mga supporters ni Pres. Benigno Simeon Aquino III ug kanhi Sen. Mar Roxas ug mga tinun-an mihugop sa usa ka kalihukan sa Cebu Coliseum nga gitambongan sa presidente.

Human sa Cebu Coliseum, mideretso si Pres. Aquino sa balay ni Arsobispo Ricardo Cardinal Vidal. Kuyog ni Pres. Aquino ang mga sakop sa iyang kabinete ug si Roxas.

Si Atty. Democrito Barcenas, lider sa Noy-Mar Movement nagkanayon kagahapon iyang gipasigarbo nga si Aquino nakakuha og 1.2 milyones botos sa Sugbo tungod kay ang katawhan sa lalawigan mituo sa kawsa sa presidente nga ang nasud mapabarog sa pagbalik pinaagi sa kaligdong.

Sa pamulong ni Aquino mipasalig kini nga dili niya pakyason ang katawhan kinsa misalig kaniya ug maoy mibutang kaniya sa pwesto.

Gipahibalo ni Aquino nga sa tibuok Central Visayas adunay kapin 50 mil ka pamilya, 2,668 niini gikan sa siyudad sa Sugbo, nga nakabenepisyo sa 4P kon Pantawid Pamilyang Pilipino Program nga nagkantidad og P15 mil tibuok tuig.

Gisigurado usab niini nga daghang trabaho ug uban pang kaayohan ang maangkon sa nasud.

Kagahapon, ang mga sakop sa Yellow Army pinangulohan ni Erwin Andaya mitambong usab sa kalihukan lakip na ang nagkalain-laing kahugpongan sa kababayen-an.

Apan dunay wala makauyon sa mga pamahayag ni Andaya tungod kay nangayo kini og puwesto sa Malacañang sa Sugbo.

Matud ni Andaya nga buot nilang makabaton og buhatan diha sa Malacañang Sugbo aron modawat sila og mga reklamo gikan sa katawhan.

Gipasalig ni Andaya nga silang mga Yellow Army magpadayon sa ilang pagpakabana ug magbantay batok sa graft and corruption sa administrasyon ni Aquino.  - Brenda D. Batuto gikan ni Rene U. Borromeo sa The Freeman (BANAT NEWS)