Ombuds mosusi ni Joavan

CEBU, Philippines - Imbestigahon sa Office of the Ombudsman-Visayas ang gikatahong paggamit sa sinagop ni Talisay City Mayor Socrates Fernandez nga si Joavan sa sakyanan sa Talisay City Hall sa dihang gi-alarma na usab sa kapolisan niadtong nakalabay’ng hapon kay nanion og armas uban sa laing tulo ka lalaki sa Mango Square sa Mango Avenue, dakbayan sa Sugbo.

Matud pa ni Deputy Ombudsman for the Visayas Pelagio Apostol nga ang iyang buhatan nagsugod na pag-imbestigar kang Joavan pinaagi sa napublikar nga mga report sa pamantalaan.

Kini dungan usab sa tinguha ni Bise Mayor Alan Bucao nga ang Committee on Ethics sa konseho sa Talisay mo-imbestigar nganong naka-drive ang job order sa Toyota Revo sa kagamhanan.

Apan si Department of Interior and Local Government-7 regional director Pedro Noval Jr. miingon nga igo lamang sila nga mohimo og fact-finding inquiry ug ang resulta ipasa nila sa Ombudsman. Apan sila ang mopatuman unsay desisyon sa Ombudsman tungod kay ubos man sa superbisyon sa DILG ang mga mayor.

Si Apostol mitataw nga ang Ombudsman magsilbeng nominal complainant sa higayon nga makita nila ang iregularidad sa paggamit sa Toyota Revo nga nadestino sa buhatan ni Mayor Fernandez.

Ang maong sakyanan nababagan sa mga polis sa Pardo Police Station human maalarma nga nanion. Apan ang sakyanan nga may plakang SGH 541 gimaneho na lamang sa usa ka Benedict Gabasa, 28, taga barangay Bulacao, Talisay City. Wala na si Joavan ug tulo ka lalaki.

Matud pa ni Apostol nga hugtan nila ang pag-imbestigar sa maong kaso tungod kay gikan sa kuwarta sa publiko ang pagpalit sa maong sakyanan lakip na sa gasoline.

Si Apostol miingon nga ipatawag niya ang mga opisyal sa Talisay pinangulohan ni Mayor Fernandez.

Si Bise Mayor Bucao buot nga masusi ang pagdala sa kawani nga job order sa Talisay sa sakyanan ngadto sa Mango Square.

Si Konsehal Celiapo Cabuenas, chairman sa Committee on Good Governance, Public Ethics, Accountability and Human Rights sa pakighinabi sa Banat News kagahapon nagkanayon nga mopahigayon sila og imbestigasyon sa insidente.

Si Arturo Bas, public information officer sa Talisay mibutyag nga si Gabasa ubos sa quota sa mayor ug nadestino kini sa feeding program alang sa mga street children sa Talisay.

Si DILG-7 director Noval miasoy sa Banat News nga base sa COA circular, kinahanglang adunay trip ticket ang paggamit sa sakyanan sa gobyerno diin ibutang ang ngalan sa drayber, kinsa nagsugo ug asa padulong.

Tungod kay walay lisensiya, matud ni Noval mahimong i-impound ang sakyanan ug mahimong mo-takeover sa pagpasaka og daghang kaso batok sa drayber ang Land Transportation Office.

Si Noval nagkanayon nga kinahanglang imbestigahon ni Mayor Fernandez nganong gidaladala ang sakyanan ni Gabasa. 

Si Gabasa pasakaan og kasong driving without license, paghupot og kagamitan sa paggamit og ginadiling drugas, ug kasong administratiba tungod sa paggamit sa sakyanan nga walay trip ticket. – BANAT NEWS