Arce giingong nanuok og 15 anyos

CEBU, Philippines - Adunay nahitabong komosyon pipila ka minutos sa wala pa magsugod ang tigom sa market authority sa dakbayan diha sa Tabo-an Public Marker dihang usa ka 15-anyos nga batang lalaki ang mireklamo ug mipasangil nga gituok siya ni city market administrator Racquel Arce.

Ang maong bata kansang inahan manghimoay og sudlanan sa puso mibutyag sa Banat News nga kalit lang siyang gituok ni Arce pasulod sa opisina niini dihang mitubag-tubag siya.

Matud pa sa maong batan-on nga gibadlong siya ni Arce tungod sa iyang paghukas-hukas og sinina apan gitubag niya kining wala pa mauga ang iyang sinina apan kalit siyang gibitad niini ug gituok.

Si Arce dihang gihinabi sa Banat News kusganong mihimakak niini gumikan kay igo ra niyang gidala ang bata sa sulod sa opisina tungod kay kini menor de edad ug naglaroy-laroy diha sa maong merkado.

Matud pang Arce tuyo unta niyang ipatawag ang ginikanan niini ug mangayo og tabang sa Department of Social Welfare and Development aron maoy mopasabot kabahin sa responsibilidad sa ginikanan sa maong bata.

Sumala pang Arce nga iyaha lang untang giabog ang mga batan-ong naghukas-hukas sa ilang sinina diha duol sa ilang opisina tungod kay adunay mangabot nga opisyales sa market authority alang sa panagtigom.

Apan giingong ang 15-anyos maoy mitubag-tubag sa pag-ingon “ngano man ipadakop ko nimo?” kini maoy hinungdan nga gidala ni Arce ang bata inabagan sa usa sa iyang mga sakop.

Matud pa ni Arce wala siya’y intensyon nga pasakitan ang maong bata apan kalit kining milugnot-lugnot maong nagaras ang liog niini dihang iyang giagbayan. – BANAT NEWS