Mga vendor sa Taboan mireklamo

CEBU, Philippines - Gidili na sa Cebu City Market Authority ang pagpaninda sa gawas ug paghimong pinuy-anan sa mga stalls sulod sa Tabo-an Public Market bisan pa man sa mga reklamo sa mga nagkadaiyang vendors.

Ang mga vendors midangop sa Cebu City Hall kagahapon ug mireklamo tungod sa pagpangguba sa mga stalls ug sa pagpangabog sa mga baligya diha sa gawas.

“Ang merkado is merkado, tindahan ra gyud. Atong klaruhon ni nga wala na (ang pagpuyo) gitugot sa syudad,” matud pang City Administrator Jose Mari Poblete, tsirman sa City Market Authority dihang gikahinabi sa Banat News.

Ang mga sakop sa market authority nagtigom kagahapon diha sa Taboan gitambungan nila ni Dr. Alice Utlang sa Department of Veterinary Medicine and Fisheries (DVMF), si Poblete, City Treasurer Ofelia Oliva, Dr. Estella Ygoña, Romulo Senining, market administrator Racquel Arce, Joseph Bernaldez ug Kon. Raul ‘Yayoy’ Alcoseba ang tsirman sa committee on markets sa Konseho.

Pipila sa mga vendors mitug-an nga maong sa gawas sila moladlad sa ilang paninda gumikan kay dunay daghang vendors nga diha na usab magtinda sa gawas ug dili na manulod.

Apan si Oliva, kinsa maoy vice chairman sa Market Authority mitug-an nga gidili na ang pagpamaligya sa gawas kini aron mamentinar ang kaluag ug kalimpyo sa dalan palibot sa merkado.

Nasuta nga adunay mga vendors nga nag-ukopar sa sulod ug naninda ang nagbutang pa gyud og mga display sa daplin sa dalan tungod sa rason nga adunay ubang vendors nga naninda usab sa gawas.

Gihulagway kini sa market officials nga usa ka matang sa pamintaha sa ubang vendors ngadto sa ilang kaubang mga vendors nga nag-abang diha sa sulod, ug maayong tapukon sila sa sulod aron tultulon sa mga mamalitay. – BANAT NEWS