CEBU, Philippines - Nagdunggab sa iyang kaugalingon ang usa ka lalaki human gikasab-an sa iyang magulang lalaki sa miaging gabii sa ilang pinuy-anan sa Kinasang-an, Pardo ning dakbayan.
Ang naghikog pinaagi sa pagdunggab sa iyang kaugalingon giila sa kapolisan nga mao si Richard Dente, 21, ulitawo ug temporaryong nagpuyo sa balay sa iyang magulang sa maong lugar apan lumad nga taga isla sa Bantayan.
Sa imbestigasyon sa kapolisan pinaagi sa grupo ni PO3 Geoffrey Gutual nga gikasab-an sa iyang magulang nga si Michael kabahin sa problema sa ilang pamuyo. Apan si Richard mikuha og kutsilyo nga gibutang sa kusina ug nagdunggab sa iyang tiyan.
Gumikan kay naigo ang iyang tinai giderikta siya sa operating room (OR) sa Cebu City Medical Center apan kagahapon sayo sa buntag gitawgan sa Homicide Section ang maong tambalanan ug gipahibalo sila sa tinugyanan sa maong tambalanan nga nakatubag sa telepono nga nakabsan sa kinabuhi si Richard.
Susihon pa sa kapolisan sa dakbayan kun unsa katinuod nga gikasab-an si Richard sa iyang maguwang nga maoy hinungdan nagdunggab kini sa iyang kaugalingon.
Si Gutual nga nahinabi sa Banat News nagkanayon nga segun sa ilang nasayran, si Richard gihulagway nga usa ka “hilomon” ug “putongon” nga pagkatawo ug posibleng wala makadawat sa pagkasaba sa iyang igsuong lalaki mao nga naghikog kini. (BANATNEWS)