Natagak sa motor namatay

CEBU, Philippines - Gituohang gi-atake sa sakit ang ulitawong guwang kinsa namatay human matagak sa gisakyan niyang motorsiklo didto sa national highway sa barangay Tuyom siyudad sa Carcar niadtong Domingo sa alas 11:30 sa buntag.

Ang namatay mao si Herman Daclan Baclayon, 72 , ulitawo, nga taga barangay Quiot , siyudad sa Sugbo.

Si SPO3 Reynaldo Fuentes sa Carcar City Police Station mibutyag sa Banat News nga ang biktima gikan sa barangay Tuyom ug paingon na untang mopauli sa dakbayan sa Sugbo ug nagpakyaw og habal-habal nga mohatud paingon sa highway aron adto mag-atang og sakyanan

 Apan samtang paingon nang mogawas sa highway ang motorsiklo nga gimaneho sa usa ka Alfredo Florita Navasquez, 43 , minyo, nga taga sitio Lamakan, barangay Valladolid Carcar, kalit lang natagak ang biktima gikan sa lingkoranan sa habal-habal.

Busa gihatod dayon sa drayber ngadto sa Carcar District Hospital apan gideklarar sa mga doctor nga dead on arrival.

Nagduda ang mga nakasaksi nga gi-atake sa sakit ang biktima hinungdan nga natagak unya nabunal ang ulo sa sementong karsada nga maoy hinungdan sa hinanali niyang kamatayon.

Hinuon gipaabot pa sa mga kabanay ang resulta sa autopsy niini pagtino sa hinungdan sa kamatayon.

(BANATNEWS)