Motorsiklo vs lubi 2 patay

CEBU, Philippines - Patay ang duha ka lalaki nga hubog human mobangga sa puno-an sa lubi ang motorsiklong ilang gisakyan didto sa kurbadahong bahin sa barangay Pajo, lungsod sa Daanbantayan, kagahapon sa alas 12:45 sa kaadlawon.

Ang mga biktima mao sila si Leogin Pepito, 26, ug si Manny Aragon, 24, pulos ulitawo, nga managsilingan sa barangay Maya, sa maong lungsod.

Si PO2 Alfredo Mandal, desk officer sa Daanbantayan Police mibutyag sa Banat News nga si Pepito kinsa maoy nagmaneho sa motor ug si Aragon nga iyang angkas pulos hubog nga gikan sa videokehan sa barangay Lanao.

Unya gawas nga hubog giingong wala pa gyud kini magsul-ob og helmet ug mipabulhot pagpadagan sa motorsiklo.

Busa sa pag-abot niini sa kurbadahong bahin sa karsada sa Pajo, wala na makontrolar ni Pepito ang dagan sa sakyanan ug imbis mosubay kini sa likoon nga dalan, misaliring kini sa daplin ug didto modasmag sa punoan sa lubi.

Matud ni PO2 Mandal nga pulos nabugtoan sa kinabuhi ang duha gumikan sa pagkapantok sa punoan sa lubi. (BANATNEWS)