Babaye giluba sa laing babaye

CEBU, Philippines - Nalandig sa tambalanan ang usa ka 27-anyos nga babaye human kini dunggaba sa laing babaye tungod sa personal nga panagbangi niadtong Sabado sa gabii diha sa barangay Biasong, dakbayan sa Talisay.

Ang biktima mao si Cherrylyn Mercadero, residente sa nahisgutang lugar kinsa nakaangkon og mga samad dinunggaban sa ibabaw’ng bahin sa walang abaga ug likod nga bahin sa iyang hawak ug daling gidala sa Talisay City District Hospital apan tungod sa kahimtang niini gibalhin kini ngadto sa Vicente Sotto Memorial Medical Center.

Ang suspetsado kinsa nagtingkagol karon sa Talisay City detention cell mao si Rubelyn Laput, 26, residente usab sa maong dapit.

Si PO2 Narciso Alforque, duty desk officer sa Talisay City Police Station sa pakighinabi niini sa Banat News kagahapon nagkanayon nga si Mercadero ug ang amahan ni Laput nakalalis apan ang suspetsado maoy mipalit sa away kay milaban kini sa iyang amahan ug mao nay nakiglalis sa biktima.

Taliwala sa panaglalis ni Laput ug Mercader, ang suspetsado mihulbot og ice pick ug dayong hansak ngadto sa biktima.

Ang mga tanod sa barangay nga sila si Jewie Fabre, Filmor Tampus ug Marlon Espinosa daling miresponde sa maong hitabo ug nasikop nila ang suspetsado.

Na-recover sa mga tanod gikan sa posisyon ni Laput ang usa ka icepick nga dunay gitas-on nga walo ka pulgada.

Si Laput gitugyan sa mga tanod ngadto nilang PO2 Stephen Sefuesca ug PO1 Rosauro Pasumala, mga polis nga miresponde sa hitabo. (BANATNEWS)