Dengue sa city under control - Mike

CEBU, Philippines - Gipadayag ni Mayor Michael Rama nga aktibo ug wala nagpabaya ang dakbayan sa Sugbo sa kampanya batok sa pagkuyanap sa sakit nga dengue.

Gihulagway sa mayor nga “under control”   ang sitwasyon sa maong sakit busa layo ra sa posibilidad nga madeklarar ang outbreak sa maong sakit.

“We have been proactive in our efforts and we are closely monitoring the situation, especially that cases outside our city has lately been disturbing," nagkanayon si Rama.

Ang City Health Department dunay natala nga 1,175 ka mga kaso sa dengue sukad niadtong Enero hangtod sa Agosto niining tuiga samtang 1,009 lang ang kaso sa susamang period sa miaging tuig.

Sa pagkakaron, ang dakbayan miumol sa programa nga gitawag og Dengue Education Awareness and Reduction (DEAR) aron hingpit nga ma-monitor ang maong sakit nga gikabalak-an sa mga residente sa siyudad.

Panawagan sa mayor sa publiko nga magmabinantayon ug manglimpiyo kanunay sa ilang palibot aron dili mosaka ang kaso sa dengue.

Matud pa ni Dr. Estella Ygonia sa City Health Department nga karong tuiga, 11 lang ang natala nga namatay ikomparar sa 23 sa miaging tuig sa susama gihapon nga period. Ang padayong pag-ulan-ulan maoy usa sa mga hinungdan nga nagpabilin gihapon ang mga lamok nga Aedes aegypti nga maoy nagdala sa dengue virus.

Nagpadayag gihapon ang Green Star program sa dakbayan nga nagpunting sa house-to-house nga kampanya aron gun-ubon ang mga lugar nga maoy kasagaran itlogan sa mga lamok. (BANATNEWS)