3 ka adik nga drayber gisikop

CEBU, Philippines - Tulo ka mga habal-habal driver ang gidakop human maaktuhing padulong mosuyop og gidudahang shabu sa mga nagpatrolyang polis sa dakbayan sa Danao diha sa dalan Juan Luna sa barangay Looc kagahapon sa buntag.

Ang gidakop tungod sa maong pasangil giilang sila si Gerome Berian, 22, Carlos Butal, 24, pulos taga barangay Agsuwaw sa lungsod sa Catmon ug kauban nilang drayber gihapon nga si Arnel Duran, 24, taga barangay Tabili sa lungsod sa Catmon.

Sumala pa ni PO2 Marlon Remollo sa pakighinabi sa Banat News nakuhaan sa grupo nila ni SPO3 Nilo Pantoja ang tulo og mga drug paraphernalia apan walay shabu nga nasakmit gikan kanila.

Giingong naagian sa mga polis ang tulo sa usa ka payag nga kadudahan ang gipanghimo hinungdan nga ilaha silang giduol ug gisitar hangtud nga nasutang padulong diay silang manuyop.

Ang tulo natanggong karon sa karsel sa maong dakbayan. (BANATNEWS)