CEBU, Philippines - Wala pa gihapoy napiliang ihulip sa hepe sa Cebu City Medical Center (CCMC) ug sa Cebu City Bureau of Fire Protection si Cebu City Mayor Michael Rama gikan sa mga girekomendar nga mga pangalan diha kaniya.
Matud pa ni Rama nga iyang gustong mailisan sa labing daling panahon si Dr. Myrna Go sanglit dugay na kini sa posisyon ug ingon man ang wala pay nakitang kalambuan sa serbisyo diha sa CCMC.
Nagkanayon si Rama nga nangayo na siya og rekomendasyon gikan sa mga consultant sa city hall apil na ang mga opisyales sa Department of Health (DOH) aron makapili siya og laing maayong director sa CCMC.
Ang mayor nagkanayon nga nakadawat na siya og pipila ka mga pangalan sa mga kwalipikadong mga doktor nga makalingkod isip director sa CCMC apan wala siyay napilian niini.
Nagdumili hinuon si Rama sa pagbutyag kun si kinsa ang mga doktor nga girekomendar nga wala niya magustohi ug subling nangayo og laing mga pangalan nga ilang masaligan nga makatarong sa pagdumala sa CCMC.
Samtang gitataw usab ni Rama nga hangtud karon wala pa usab siya nakapili og bag-ong City Fire Marshall nga iyang ipuli kang City Fire Marshall Esmael Codilla.
Ang mayor nagkanayon nga nangayo na usab siya og laing mga opisyales nga sama og ranggo ni Codilla gikan sa Bureau of Fire and Protection regional office.
Kini aron may mapilian na siyang opisyales sa BFP nga makapuli kang Codilla.
Nasayran nga mipakita og kadisyama ang mayor ngadto kang Codilla tungod sa kapakyasan sa kabomberohan sa dali nga pagpawong sa sunog sa barangay T. Padilla ning siyudad nga maoy gikonsiderar nga labing dako nga sunog dinhi sa Sugbu sulod niining tuiga.
Apan daan nang miklaro si Rama nga wala kini kalambigitan sa pagpahulip kaniya tungod kay dugay na usab kaayong hepe sa kabomberohan sa siyudad si Codilla. (BANAT NEWS)