Mamalitay'g shabu mireklamo gipatay

CEBU, Philippines - Usa ka mamalitay og shabu kinsa mireklamo sa iyang napalit nakulatahan ug natigbasan patay didto sa sitio Pagusungan, barangay Caputatan Sur, lungsod sa Medellin sa miaging adlaw.

Ang biktima nailhan nga si Romanito “RJ” Beguña, 28, nga taga Lamintak Norte, samtang ang suspetsado nailhan usab nga sila si Silveriano Sabrido Sr.,ug ang duha niini ka mga anak nga sila si Silveriano “Dodong” Sabrido Jr., 18, ug Edwin Sabrido, 28, pulos molupyo sa maong lugar.

Base sa inisyal nga imbestigasyon sa kapolisan sa lungsod sa Medellin nasayran nga usa ka Primitibo Ancit Jr. ang midangop sa ilang buhatan ug mipahibalo kalabot sa nahitabong kagubot sa panimalay sa pamilyang Sabrido.

Tungod niini daling mirespondi ang kapolisan ug ilang naabtan ang patay’ng lawas sa biktima nga naglunang sa kaugalingong dugo nga naputos sa bun-og ug dinunggaban sa nagkalainlaing bahin sa lawas niini.

Matud pa ni Ancit nga ang biktima nagsakay sa iyang motorsiklo uban sa usa ka Jefferson Hermoso paingon sa panimalay sa mga Sabrido.

Midugang si Ancit nga ang amahang usa sa mga suspetsado maoy mitunol og usa ka paketing shabu ngadto sa iyang anak (wala masayri ang ngalan) nga mao usay mihatag niini ngadto sa biktima.

Unya mibayad usab ang biktima og P500 ngadto ni Sabrido Sr. ug gisukli-an nalang kini og P100.

Apan tungod niini mireklamo ang biktima ug iyang giuli ang giingong shabu nga iyang gipalit apan si Edwin Sabrido kinsa nasuko sa gibuhat sa biktima kalit lang nga miduol ug mikulata sa naulahi .

Samtang gikulata ang biktima ,si Sabrido Jr. kinsa nagdala og cane cutter o espadin kalit usab nga miduol sa biktima ug mitigbas ug mitusak-tusak sa lawas niini pinaagi sa iyang espadin.

Si Ancit matud pa misuway unta sa pagsanta sa batan-ong Sabrido apan wala na kini mopatuo kaniya

Gani si Ancit mismo natapsingan usab sa espadin ug samdan usab siya sa walang tudlo.

Dihang mihutlay na ang biktima ug nakabsan na sa kinabuhi si Ancit gimandoan ni Edwin Sabrido nga padraybon sa iyang motorsiklo uban sa manghod niini nga si Sabrido Jr. aron motahan sa kapolisan.

Apan sa diha nga naabot na sila sa national highway sa barangay Caputatan Sur nausab ang desisyon ni Edwin ug iyang gimandoan si Ancit nga adto nalang sila sa kapolisan sa syudad sa Bogo moreport. Hinungdan nga gituman kini ni Ancit ug sa dihang naabot na sila sa may sitio Lakdon Dayhagon sa maong dakbayan, gimanduan nila pagpahunong si Ancit ug daling nanagan ang managsuong Sabrido.

Samtang sa Ancit mipasirit usab dayon sa iyang sakyanan paingon ngadto sa kapolisan.

Sa pag-abot nila didto sa balay sa mga Sabrido   naabtan nila ang biktima nga wala nay kinabuhi mihimo dayon ang kapolisan og hot pursuit operation ug nasikop ang suspetsado nga amahan nga si Sabrido Sr.

Sa pagkakaron gitanggong siya sa Medellin Police Station. (BANAT NEWS)