CEBU, Philippines - Dili seryoso sa kampanya bahin sa tukmang paghipos sa basura ang mga barangay opisyal sa dakbayan sa Mandaue tungod kay 5 lamang sa 27 ka mga barangay niini ang hugtanong nagpatuman sa maong programa.
Si Placido Jerusalem nga maoy solid waste management officer sa kagamhanan sa maong dakbayan nga nahinabi sa Banat News nagkanayon nga ang lima ka barangay sa dakbayan nga hugot nga nagpatuman sa pagbahig sa mga basura mao ang barangay Canduman, Bakilid, Banilad, Ibabao Estancia ug Mantuyong.
Samtang ang 23 ka barangay dili seryoso sa pagtuman sa Republic Act 9003 kon Solid Waste Management of 2001, matud pa ni Jerusalem.
Ang environmentalist lawyer Benjamin Cabrido miingon nga makigtagbo siya sa mga barangay kapitan aron tukion ang maong programa nga gipatuman sa dakbayan.
Matud pa ni Cabrido nga ang dakbayan sa Mandaue nga gipangulohan ni Mayor Jonas Cortes seryoso nga nagpatuman sa maong programa ug pipila ka mga pribadong sector misuporta niini.
Si Cabrido miingon nga lakip sa mitanyag sa ilang suporta sa maong programa mao ang Ramon Aboitiz Foundation Inc. (RAFI) alang sa kaayohan sa mga molupyo sa dakbayan. - BANAT NEWS