Pribadong sektor, unibersidad mialalay sa gobyerno

CEBU, Philippines - Nakig-alayon karon ang kagamhanan sa dakbayan sa Sugbo sa pribadong sektor ug sa nagkadaiyang unibersidad aron sa pagpanglimpiyo sa mga sapa ning dakbayan.

Kini samtang gisaulog ning buwana ang National Clean Up Month nga nagtangag sa tema nga “Adopt a River, Adopt a Barangay” ug proyekto kini sa Cebu City River Management Council (CCRMC).

Matud pa ni Konsehal Nida Cabrera nga tinguha sa maong proyekto   nga malimpiyohan ang Guadalupe River nga naglatas-latas sa   nagkalainlaing barangay sa siyudad.

Ang mga sapa nga giagian niining Guadalupe river mao ang anaa sa mga barangay Guadalupe, Kalunasan, Ermita, Sambag 1, Sambag 2, Pahina San Nicolas, Pasil, San Nicolas Proper, Sapangdaku ug Capitol Site.

“Dunay mga private sector nga misaad nga mosuporta sa maong project. Ang mga student pud kay andam motabang, tagsa-tagsa nila, adunay gi-adopt nga mga barangay, ug mohimo sila og nagkadaiyang programa aron mamintinar ang kalimpiyo sa gi-adopt nila nga sapa,” nagkanayon si Cabrera.

Ang siyudad mopahigayon usab og “Cebu Great River Clean-Up Day” karong Septiyembre 18 sa buntag.

Giawhag usab ni Cabrera ang publiko nga dili mag-pataka og labay sa ilang  mga basura aron malikayan usab ang nagkadaiyang sakit ug ang kalit nga paglunop sa sapa sa higayon nga mobunok ang kusog nga uwan.  - BANAT NEWS