CEBU, Philippines - Ang mga opisyal sa League of Municipalities of the Philippines (LMP) Cebu Chapter nakadesisyon nga dili na nila ipadayon ang pagpasar sa resolusyon nga nagkondena kang Mayor Maria Luisa "Malou" Loot sa lungsod sa Daanbantayan gumikan sa pagpakig-away niini kang Gobernador Gwen Garcia.
Suma pa sa LMP Cebu Chapter President, nga si Mayor Nelson Garcia sa Dumanjug nga wala madayon ang ilang labing unang tigom sa tanang mga miyembro sa LMP niadtong Septembre 4, 2010 kay may laing gitambongan ang mga opisyal niini.
Kini ang hinungdan nga wala usab mahisguti ang ilang giplanong ipasar nga resolusyon batok kang Loot.
Si Garcia mitumbok nga dili na kinahanglan pa nga ipasar ang maong resolusyon tungod kay nagpakahilom naman si Loot niining higayona.
Matud pa niya nga ila na lang pasagdan si Loot nga muatobang sa iyang atraso batok sa gobernadora.
Hinuon ang lakang sa One Cebu Party sa pagtangtang kang Loot sa partido, nagpadayon na karon.
Dugang pa ni Garcia nga ang disisyon unya sa ilang partido ila usab unya nga suportahan sanglit mao man kini ang tingug sa kinabag-ang mga opisyal sa LMP nga miyembro usab sa One Cebu Party nga gipangulohan ni Gov. Gwen Garcia. - BANAT NEWS