Akyat barko sa naga

CEBU, Philippines - Mga babaye nga nagbaligya sa ilang dungog nga naglakip sa pipila ka minor de edad giingong mangatkat sa mga barko nga modunggo sa dakbayan sa Naga aron motanyag og hamubong kalipay sa mga tripulante.

Usa ka residente sa lugar kinsa nagdumili pagpaila mibutyag sa Banat News kagahapon nga ang maong isyu taud-taod na apan gikahadlok nga wala na kini kasulbaran.

Matud sa maong residente nga ang modunggo diha sa dakbayan sa Naga nga mga foreign vessel maghatod og mga coal ug magkarga usab og mga semento. Adunay pipila nga mga domestic vessel.

Kasagaran sa maong mga babaye nga gitawag nila og “AB” o Akyat Barko giingong naggikan sa mga silingang siyudad ug kalungsuran sa Naga.

Giingon usab nga tungang gabii na kining moanha sa Naga ug manakay og pumpboat aron mangatkat sa mga barko nga anha mag-angkla sa kadagatan sa Naga. Ang impormante nagkanayon nga kaadlawon na sa dili pa mosidlak ang adlaw manganaog ang mga babaye. Kini aron paglikay masakpan sa mga awtoridad.

Adunay pipila sa maong mga babaye ang mapasanginlang manghilabot sa mga personal nga butang sa mga tripulante sa barko.

Si PO2 Miguel Castañares, duty desk officer sa City of Naga Police Station nga nahinabi sa Banat News kagahapon mibutyag nga kaniadto duna siya’y nadawat nga mga reklamo gikan sa mga tripulante sa barko nga gikawatan sila sa ilang mga butang sa mga babaye nga nangatkat sa barko nga ilang gitrabahoan apan dili na masubay ang maong babaye tungod kay nag-alyas man kini og mga ngalan.

Matud niya nga mokabat na sa 10 ka biktima ang mipa-blotter sa ilang buhatan. Kasagaran niini mga Tagalog apan karon wala na sila’y nadawat nga samang reklamo.

Gibutyag usab ni PO2 Castañares nga dunay insidente kaniadto nga dunay mga babaye nga mianha sa ilang buhatan aron magpa-blotter tungod kay giingong wala bayri sa mga tripulante nga ilang gikasabot.

Ang maong bayad giingong bugti sa ilang paghatag og hamubong kalipay sa maong mga lalaki.

Si PO2 Castañares nagkanayon usab nga ang siyudad sa Naga padayon sa pag-implementar sa curfew sa mga minor de edad apan ang giingong mga bata nga AB lisod masakpan tungod kay magtago-tago man usab kini.

Ang Banat News mitawag kagahapon sa mga numero sa telepono ug cellphone ni Mayor Valdemar Chiong aron makuhaan kini og pamahayag kabahin sa maong report, apan walay mitubag sa tawag. – BANAT NEWS