Aguilos mibahad na usab sa mga taxi driver

CEBU, Philippines - Ang regional director sa Land Transportation Office (LTO-7) nga si Raul Aguilos mibahad na usab nga dili magpanagana ang iyang buhatan sa pagpanakop ug pagpahamtang og silot sa badlongong mga drayber nga mopahimulos sa ilang mga pasahero.

Matud pa ni Aguilos nga daghan nang nadawat nga report ang iyang buhatan batok sa mga taxi drivers nga dili na mogamit og metro sa taxi kay pakyaw system maoy ipatuman ug kusog kaayong manglubag ngadto sa mga pasahero.

Si Aguilos mibahad nga dili lamang nila ipadakop ang taxi driver kay niining higayona apilon pa nila pag-impound ang taxi unit nga gidrayban niini.

Gituyo kini aron motabang pagpahinumdom ang mga taxi operators ngadto sa ilang mga drayber nga dili manglubag sa ilang mga pasahero ug gamiton gyud kanunay ang metro.

Nasayran nga adunay mga taxi driver nga modani og mga pasahero sa pier area ning siyudad sa Sugbo nga i-kontrata nga dili mogamit og meter ug sa higayon nga dili magkasinabot pakanaugon ang pasahero sa dapit diin lisod ang sakyanan.

Ang maong suliran maoy usa sa rason nga gipirmahan kagahapon ang memorandum of agreement (MOA). Sa maong MOA, gikasabotan nga ang Cebu Port Authority mohatag og accreditation sa mga taxi units nga anha mamasahero sa pier area.

Misalmot sa maong kasabutan nga motabang paggukod sa abusadong mga taxi driver mao ang CPA, Land Transportation Franchising and Regulatory Board (LTFRB-7), LTO-7 ug Cebu City Traffic Operations Management (Citom). – BANAT NEWS