Gikan nga nag-inom gipatay

CEBU, Philippines - Patay nang napalgan sa iyang mga kainom ang 53-anyos nga lalaki daplin sa dalan kinsa nananghid nga mouna unta sa pagpauli human sa ilang panag-inum diha sa barangay Cansaga sa lungsod sa Consolacion kagahapon sa alas-5 sa buntag.

Ang biktima nga nagbuy-od nang walay kinabuhi mao si Saturnino ‘Satur’ Pepito, 53, molupyo sa Purok-5 barangay Lamak, Consolacion samtang ang suspek wala pa matumbok sa kapulisan atol sa paghimo ning balita.

Matud pa ni PO1 Nilon Suico sa Consolacion Police Station dihang nahinabi sa Banat News, ang biktima nananghid sa iyang mga barkada nga mouna sa pagpauli ug gibiyaan ang mga kaubanan sa sayong kaadlawon kagahapon.

Apan dihang namauli na ang mga barkada nga sila si Roel Maglasang, Arsenio Ortega ug Desiderio Capangpangan, nianang pagka-alas-5 sa buntag nakit-an nalang nila kining nagbuy-od daplin na sa dalan nga wala nay panimuot.

Dali nila kining gisusi ug mao nalay ilang nadiskubrehan nga aduna kini samad dinunggaban sa walang bahin sa dughan ug naglunang sa dugo nga nag-ubo sa yuta.  - Darrel Carumba ug Reggie Pajaron (BANAT NEWS)