Beauty Queen nangulo vs. dengue

CEBU, Philippines - Gipangunayan ni Mutya ng Pilipinas 2010 2nd Runner Up Sharon Grace Angel ug sa mga opisyal sa dakbayan sa Lapulapu ang pagpanglimpiyo sa palibot aron malikayan ang sakit nga dengue sa barangay Mactan dakbayan sa Lapulapu kagahapon sa buntag.

Si Angel giubanan nila ni Konsehal Harry Don Radaza ug Konsehal Leigh Dignos Vidal nanglimpyo sa maong lugar agi og pagpakita isip ehemplo sa mga molupyo kabahin sa kaimportansya sa limpyong palibot batok sa sakit nga dengue.

Matud pa ni Angel isip usa ka Oponganon, naguol siya sa iyang nadawat nga impormasyon nga duha na ka bata ang namatay gumikan sa sakit nga dengue.

Natumbok sa mga tinugyanan sa panglawas nga ang pagpanglimpyo maoy usa sa labing epektibong pangontra sa dengue ilabi na sa mga dapit diin sila mangitlog.

Nanghinaut si Angel, kinsa residente sa barangay Marigondon, nga kanunayon sa katawhan ang pagpanghinlo sa ilang palibot. Si Angel, tinun-an sa kursong Tourism sa University of San Carlos maoy gideklarar nga Ambassador sa Lapulapu Island of Experience.

Samtang si Kon. Radaza nasagmuyo sa kamatayon sa duha ka bata nga gikan sa sitio Kitchen sa barangay Pajo sa maong dakbayan ug sa milabay’ng petsa 1 ning bulana laing bata ang namatay sa susamang sakit.

Giawhag ni Kon. Radaza ang City Health Department sa pagpahigayon og subsob nga kampanya sa pagsumpo niini gamit ang giaprubahang pundo sa konseho alang niini.

Sumala pa sa talaan sa DOH-7, ang Lapulapu anaa sa ikatulong pwesto nga adunay labing daghang kaso sa dengue sa tibuok Central Visayas. – BANAT NEWS