Walo ka bata patay sa dengue

CEBU, Philippines - Mikabat sa walo ka mga bata ang namatay gumikan sa sakit nga dengue sa nagkalainlaing lugar ning lalawigan sa Sugbo sulod niining buwana.

Si Mae Berlin Alvios, nurse sa Regional Epidemiology Surveillance Unit (RESU-7) mibutyag sa Banat News nga ang labing ulahing namatay kagahapon sa buntag mao ang 6 anyos nga batang babaye nga taga barangay Jubay, lungsod sa Liloan , ug ang 14 anyos nga lalaki nga taga barangay Baring, lungsod sa Carmen kinsa pulos   nakabsan sa kinabuhi sulod sa Vicente Sotto Memorial Medical Center.

Samtang ang namatay niadtong Agosto 30 mao si Blanco Lara Jade, 5 anyos nga batang babaye nga taga dalan Manalili, dakbayan sa Sugbo kinsa didto makabsi sa kinabuhi sulod sa usa ka pribadong tambalanan,

Sa laing bahin gibutyag ni Dr. Debbie Catulong sa Mandaue City Department sa Banat News  nga may tulo ka mga bata sa dakbayan sa Mandaue nga namatay usab sa sakit nga Dengue.

Usa niini mao ang 7 anyos nga batang babaye nga taga barangay Pagsabungan, ug laing duha nga mao ang 3 anyos nga batang lalaki ug ang usa ka tuig nga batang babaye nga pulos taga barangay Paknaan, tanan sa dakbayan sa Mandaue.

Base sa record sa RESU-7 mikabat na sa 5,571 ang tanang kaso sa dengue sa tibuok Central Visayas , ug 12 usab ang namatay ning tuiga nga mas taas kun itandi sa susamang periodo sa miaging tuig diin mikabat lang sa 4,342 ka mga kaso apan 61 usab ang namatay.

Tungod niini ang kagamhanan sa dakbayan sa Sugbo migahin og P7 milyones aron ipamalit og kahimaman batok sa dengue.

Matud pa ni Mayor Michael Rama nga kinahanglang matag sakop sa pamilya nga adunay simtoma sa dengue, ipakonsulta dayon sa doktor aron kahatagan dayon kini og tambal ug kalikayan ang dautang epekto sa dengue.  - Darrel A. Carumba, Bong Soriano, Romeo Limpangog ug Sanden J. Anadia (BANAT NEWS)