Pusil ug dunggab 2 patay

CEBU, Philippines - Duha ka kinabuhi ang nakalas gumikan sa pagpamusil ug pagpanunggab sa managlahing dapit sa dakbayan sa Lapulapu sa milabay’ng gabii ug kagahapon sa kadlawon.

 Ang mga biktima mao sila si Arjie Panuncial, 27, ulitawo nga taga barangay Buaya, usa ka trabahante sa MEPZ , ug si Ferdinand Amodia, hingkod, nga taga Sitio Kadulang, barangay Marigondon , pulos sa dakbayan sa Lapulapu.

 Si SPO2 Rolito Jumao-as sa Lapulapu City Police Office nagkanayon nga si Panuncial napalgan sa kapolisan nga nagbuy-od sa daplin sa karsada sa Maximo Patalinghug Avenue kagahapon sa alas 2:10 sa kaadlawon nga may samad dinunggaban sa lawas ug naglunang sa iyang kaugalingong dugo.

Gihatod dayon ngadto sa Mactan Doctors Hospital  apan nasayran nga nianang alas 4:00 sa kaadlawon nakabsan kini sa kinabuhi.

Nagtuo ang kapolisan nga gitulis si Panuncial kay nawala na ang iyang pitaka, cell phone, ug relo, unya misukol kini sa mga tulisan hinungdan nga giluba .

Samtang si Amodia gipusil patay sa duha ka wala hiilhing kriminal nga nagsakay og motorsiklo didto sa sitio Ibabao, barangay Agus sa miaging gabii.

Napisok sa bala ang iyang tuong mata ug maoy hinungdan sa hinanaling kamatayon niini.

Wala hisayri sa kapolisan ang hinungdan nganong gipatay si Amodia ug padayon pa nila karong gipangita ang mga kriminal nga mipatay sa duha ka mga biktima. - Bong Soriano ug Romeo T. Limpangog (BANAT NEWS)