Giyak-an pagluba ang lalaki

CEBU, Philippines - Usa ka lalaki nga giingong manggamitay og ginadiling drugas gidunggab sa makadaghang higayon sa iyang gikalalis human ang naulahi nasuko nga gibadlong sa suspek nga nangihi kilid sa karenderya kagahapon sa buntag sa P. Del Rosario corner D. Jakosalem St,. barangay Sta. Cruz ning siyudad.

Nalandig sa Cebu City Medical Center si Victor Dumayday, 49, minyo ug taga dalan Ranudo, barangay Sta. Cruz human nakaangkon og daghang samad dinunggaban sa dughan nga nasentro sa baba sa iyang atay, walang kamot ug tuong bugan ug tiyan.

Samtang nadakpan ang nanunggab nga si Danilo Fuentes, 42, taga barangay Kamagayan human naabtan sa Mobile Patrol car 018 nga gipangulohan ni PO2 Meonic Cabañero nga miyaka pagdunggab ngadto kang Dumayday.

Si Fuentes mipasangil nga iyang gibadlong si Dumayday nga dili paihian ang kilid sa karenderya apan nasuko kini ug giaksyonan siya’g sukmag.

Matud ni Fuentes nga wala niya tubayi ang paghana og sukmag sa suspek apan migawas siya sa Kamagayan aron mopalit og “puto” apan nagkaabot hinuon sila ug didto giingnan siya sa suspek nga “wala ka makaila nako part?” dayon hana og bunal og kahoy ngadto kaniya.

Si Fuentes nagkanayon nga nakakita siya’g kutsilyo kilid sa tindahan ug maoy iyang gidunggab makadaghang higayon.

Si SPO2 Roger Nedamo sa Homicide Section miingon nga alegasyon lang sa suspek nga nasuko ang biktima human niini gibadlong apan kinahanglan pa nilang estoryahon kun nganong gidunggab ang biktima sanglit naglisod pa kini sa pagsulti ngadto kanila sulod sa tambalanan.

Ang mga tawo miasoy sa kapolisan nga nagkalalis ang suspek ug ang biktima sa wala pa magharong.

Si Fuentes gibalhog sa karsel sa Cebu City Police Office.  – BA NAT NEWS