NFA rice ipamolitika ni Gwen?

CEBU, Philippines - Mitumaw karon ang pagduda nga gamiton ni Gob. Gwendolyn Garcia sa eleksiyon sa barangay ug Sangguniang Kabataan (SK) ang bugas nga pamaliton sa Kapitolyo.

Si Bise Gobernador Gregorio Sanchez Jr. maoy mibutyag niini human gihatagan si Garcia og gahum sa Hunta Probinsiyal nga makasulod og kasabutan tali sa National Food Authority (NFA) aron maka-utang og 10 mil ka sakong bugas.

Apan si Garcia mihimakak sa alegasyon ni Sanchez nga ang bugas gamiton sa pamolitika.

Gipasabot sa gobernadora nga ang memorandum of agreement (MOA) nga iyang sudlan tali sa NFA gitagana alang sa mga biktima sa kalamidad.

Gitataw niya nga atol unya sa orientation sa mga mayor sa ipahigayong Provincial Development Council Meeting sunod semana, iyang aghaton ang mga mayor nga makig-MOA usab sa NFA aron makautang og bugas alang sa pagtabang sa mga biktima sa kalamidad.

Matud pa sa gobernadora nga pinaagi sa "purchase in credit" sa NFA makuha dayon ang bugas ug unya na isunod ang bayad tungod sa kataas sa proseso sa pagbayad niini.

Sa sayo pa, si Sanchez mitumbok nga nagduda siyang politika ang nagpaluyo sa paghatag og bugas sa gobernadora sanglit tayming kini sa umaabot barangay election sunod bulan. – BA NAT NEWS