Lungsod pahimoo'g cr para turista

CEBU, Philippines - Ang mga kalungsoran ug kabarangayan sa probinsiya sa Sugbo gihangyo sa mga sakop sa hunta probinsiyal nga mogama og mga comfort room (CR) o pansayan alang sa mga turista.

Si Provincial Board member Arleigh Sitoy maoy misugyot niini pinaagi sa iyang resolusyon nga nagkanayon nga karong mga panahona nag-anam ka daghan ang mga turista nga molibot sa lalawigan ug manghunong sa mga lungsod aron maniid sa mga kalihokan sa mga molupyo ug mosil-ing usab kun unsay mga makapadani kanila nga mga butang.

Apan ang labing gipangita sa mga turista gawas sa pagkaon ug mga kulturanhong gasa, mao ang mga tourist spot sama sa mga maanindot nga mga beach ug mga makasaysayanon kaayong mga eksena sa usa ka lungsod.

Apan matud pa ni Sitoy nga daghang mga turista ang nangreklamo tungod kay wala sila makakita og mga public comfort room sa mga kalungsoran ug kabarangayan nga ilang magamit.

Sigun pa ni Sitoy nga may mga pansayan sa kalungsoran ug sa kabarangayan nga ipagamit sa publiko apan dili angayan alang sa mga turista tungod kay dili presentable ug dili usab limpyo tan-awon.

Matud pa ni Sitoy nga importante kaayo nga hatagan og pagtagad sa mga opisyal sa kalungsoran lakip na sa mga kabarangayan ang nag-unang panginahanglanon sa mga turista.

Kini aron nga dili sila motagam sa pagbisita dinhi sa Sugbo ug labi pa silang ganahan sa pagsuroy sa nagkalainlaing lugar sa lalawigan.

Ang pagbutang og mga CR nga desente, limpyo ug humot, usa sa mga paagi nga makabig sa usa ka lugar ang mga dumoduong nga gikan sa laing kanasuran.

Ang pagdagsang sa turista, makatabang kaayo sa mga molupyo sa matag lugar sa lalawigan, matud pa ni Sitoy. – BANAT NEWS