Lawas sa babayeng naglutaw dugta na

CEBU, Philippines - Miburot ug nalata na ang lawas ug milugwa pa ang mata sa patay’ng lawas sa usa ka babaye nga nakit-an sa usa ka mananagat samtang naglutaw- lutaw kini sa kadagatan sa barangay Arbor ,lungsod sa Boljoon sa miaging buntag.

Ang tanod nga si Romualdo Mier sa Arbor maoy nipahibawo sa kapolisan bahin niini.

Si SPO4 Cristino Uraca, Deputy Chief sa Boljoon Police Station mibutyag sa Banat News nga wala pay miila sa biktima apan usa siya ka babaye nga gibana-banang nagpangidaron og 30 ngadto sa 40 anyos pataas, kansang lawas miburot ug nadugta na ug migawas pa ang iyang duha ka mata .

Matud ni SPO4 Uraca nga ang biktima gibana -banang 5 piyes ang barog ug nagsul-ob og senina nga kolor puti, blue nga karsones, gray nga bra nga adunay design ug nagtiniil lang.

Gihulagway ni SPO4 Uraca nga halos dili na maila ang nawong niini tungod kay nalata na ug baho na usab kaayo hinungdan nga nakahukom silang ipalubong nalang kini aron nga dili maghatag og peligro sa panglawas sa mga molupyo sa Arbor apan ilang gibutangan ug timaan ang gilubngan aron sayon ra sa mga tagtungod ang pagpahabwa niini kun gikinahanglan.

Gituohan ni SPO4 Uraca nga nalumos ang biktima ug walay posibilidad nga gituyo kini sa pagpatay kay kompleto pa man ang sapot.

Midugang si SPO4 Uraca nga gipahibawo siya sa iyang bayaw nga si Ananias Niere sa sitio Saksak, barangay El Pardo, Boljoon nga ang biktima nakit-an usab sa mga mananagat sa lungsod sa Alcoy nga naglutaw-lutaw sa dagat sa miagi pang adlaw apan ila lang kining gipasagdan.

Gituohan nga hapit nang usa ka semana nga naglutaw-lutaw sa dagat ang biktima sanglit miburot ug nadugta naman ang lawas niini.

Nanawagan ang kapulisan sa mga kabanay nga adunay paryente nga missing sa pagsusi niini sa ilang buhatan alang sa dugang impormasyon aron mapahiluna og tarong ang patay’ng lawas sa biktima. – BANAT NEWS