Chiong miluwat og EO

CEBU, Philippines - Miluwat kagahapon og executive order si Mayor Valdemar Chiong sa lungsod sa Naga alang sa temporaryong pagpahunong sa gipahigayong quarry sa JLR Construction and Aggregates Inc. samtang nagtuman pa sa mga rekomendasyon gikan sa Department of Environment and Natural Resources (DENR).

Ang JLR anaa sa barangay Cogon diin maanod ang duha ka magsuong bata tungod sa baha mugna sa pag-awas sa tubig sa sapa tungod sa pag-ali niini sa maong kompaniya.

Matud ni Chiong nga ang operasyon sa JLR temporaryo una niyang ipasuspenso hangtod mahatagan og certification gikan sa DENR nga nakatuman na kini sa mga rekisitos.

Ang maong suspension order posibleng molungtad kini og mga adlaw o buwan depende sa JLR sa gidugayon sa ilang pagproseso sa mga rekisitos ngadto sa DENR.

Si Chiong miluwat sa nahisgutang suspension order human sa nahitabong flash flood niadtong Agosto 29, 2010 nga namatyan sa magsuong Paran.

Ang maong kompaniya nag-operate og quarry sa ibabaw’ng bahin sa barangay Cogon duol sa sapa diin ang tulo ka minor de edad uban sa ilang lola mitabok ug naanod sa kusog kaayong baha.

Ang DENR mimando sa JLR nga mobuhat og kanal nga maagian sa tubig gikan sa tiilan nga matagakan niini sa barangay Cogon paingon ngadto sa ubos nga bahin sa Guindaruhan River.

Gimandoan usab ang maong kompaniya sa DENR nga pabuhaton og mga culverts duol sa sapa.

Ang JLR nag-operate diha sa bukirang bahin sa Naga sulod na sa 20 ka tuig.  – BANAT NEWS