FX vs sikad, 1 patay

CEBU, Philippines - Usa ang namatay samtang usa usab ang naangol human dasmagi sa Tamaraw FX ang usa ka traysikad sa barangay Pakigne, lungsod sa Minglanilla sa miaging gabii.

Ang biktima mao si Conchita Dayoha, 59, minyo nga taga barangay Duljo-Fatima, dakbayan sa Sugbo ug pasahero sa traysikad, samtang ang naangol mao si Ariel Genilisa Collados, hingkod, ulitawo nga taga Pakigne, nga maoy drayber sa traysikad.

Sumala sa kapolisan sa Minglanilla nga milabang sa highway sa Pakigne ang traysikad dihang nadasmagan kini sa nagbagiyos nga FX nga nagpaingon sa dakbayan sa Sugbo gikan sa habagatan.

Ang FX gimaneho ni Armando Nubia Libre, hingkod, nga taga barangay Basak, dakbayan sa Sugbo.

Mitahan si Libre sa kapolisan sa Minglanilla human sa hitabo, samtang giandam na ang kiha batok kaniya. – BANAT NEWS