Mag-uuma gipusil patay sa tanod

CEBU, Philippines - Gipusil patay sa tanod ang usa ka mag-uuma nga iyang kontra samtang nagpahulay kauban sa asawa sa usa ka payag sa bukirang barangay sa Magcagong, lungsod sa Sibonga niadtong Domingo sa alas 7:30 sa gabii.

Ang biktima mao si Anastacio Narca, 42, minyo, molupyo sa maong lugar. Samtang ang suspek mao si Sergio Laluna, 39, minyo ug tanod sa maong barangay.

Matud ni PO3 Ederlino Bacusmo sa Sibonga Police Station sa dihang nahinabi sa Banat News nga ang biktima kauban sa asawa nga si Elena Narca gikan nanan-aw og volleyball.

Paingong mamauli namahulay una sila sa ilang payag apan sa dihang nagtupad sa paglingkod miabot ang suspek nga armado sa wala matinong kalibre sa armas ug mipusil makadaghang higayon sa biktima.

Ang biktima nakaangkon og tulo ka samad pinusilan sa dughan ug tiyan ug dihadiha nahagba dayon nagsinggitsinggit ang asawa pagpangayo og panabang ug gigakos niini ang nagkadugong bana.

Ang suspek misibat apan mitahan ni Kagawad Liocadio Canbungga pagkabuntag ug gitahan ngadto sa kapolisan.

Sa dihang gisukitsukit sa kapolisan, matud sa suspek nga gipatay niya ang biktima tungod kay dugay na siyang gikontrahan niini. – BANAT NEWS