Negosyante gipusil sa tulisan

CEBU, Philippines - Kritikal ang kahimtang sa usa ka negosyante sa siyudad sa Carcar human banhigi sa upat ngadto sa lima ka tulisan aron unta tulison samtang nagsakay sa multicab sa luyong bahin sa Gaisano Carcar sa Sitio CYO, barangay Poblacion 3 niadtong Domingo sa gabii. Ang gitulis mao si Roel Florita, negosyante, minyo ug molupyo sa maong lugar. Samtang upat ka mga lalaki ang gitumbok nga suspek nga luwan og duha ka motorsiklo nga pulos kolor puti.

Matud ni PO3 Dante Ramos sa Carcar City Police Station sa dihang nahinabi sa Banat News nga ang biktima gikan nanirado sa tindahan sa dihang misakay sa multicab paingong mopauli kuyog sa asawa nga si Mercy nga maoy nagbitbit sa bag nga gisudlan sa halin.

Dili layo sa merkado dihang paingon sa liko-on nga bahin paingon na unta sa usa ka village nga gipuy-an sa mga biktima kalit gibabagan ang magtiayon sa usa ka lalaki nga nagbarugbarog daplin sa karsada dayong pusil makadaghang higayon ug miabot ang duha ka motorsiklo.

Nakaangkon og duha ka samad pinusilan sa aping ug tapsing sa ilong ang biktima samtang ang asawa nakugang sa hitabo nagsinggitsinggit usab pagpangayo og tabang.

Gituohan sa kapolisan nga nangahadlok ang mga suspek ug nanakay og balik sa duha ka motor nga nag-angkasay ug misibat pahilayo.

Sa pagresponde sa mga polis, gihatod ang biktima lahos sa South General Hospital sa siyudad sa Naga tungod sa delikadong kahimtang.

Gituohan sa kapolisan nga panulis ang motibo sa krimen apan nabulilyaso kini human gituohan usab nga dili pa kaayo suhito paggamit sa armas ang namusil nga suspek nga gi-rapid ang 9mm pistol.

Ang kapolisan naka-recover og empty shell sa 9mm sa crime scene nga gituohang gipanag-iya sa mga suspek.

Ang kapolisan padayon pa sa ilang hot pursuit operation pagsikop ug pag-ila sa mga suspek. (BANATNEWS)