Sikyu giloglog

CEBU, Philippines - Patay ang usa ka guwardiya sa dakong mall human giloglog ang liog niini sa usa ka hubog ug gibunalan pa gyud og gahi nga butang ang ulo niini nga maoy nakaingon sa hinanaling kamatayon.

Nahitabo ang insidente kagahapon sa kaadlawon sa alas 3 sa kaadlawon diha sa sitio Kamagong, barangay Lahug ning siyudad.

Ang guwardiya giila sa kapolisan nga mao si Raymund Solon, sakop sa Probe Security Agency ug nadestino sa Ayala Business Park nga taga Camagong, Lahug.

Nadakpan hinuon sa mga sakop sa Mobile Patrol Group (MPG) nga gipangulohan ni SPO2 Desiderio Mendaros si Danilo Carbona, 28, construction worker ug kasamtangan nagpuyo sa Kamagong apan lumad nga taga barangay Santicon, lungsod sa Badian kinsa nalandig usab sa Cebu City Medical Center human nakaangkon og grabeng bun-og sa nawong ug kalawasan human gitabangan og kulata sa mga tawo sa dapit.

Sumala pa sa kapolisan, ang guwardiya migukod sa usa ka tawo nga hubog nga nagsige og panghapak sa signage sa Ayala Business park ug niadtong higayona mao kini roving guard.

Si Solon nagsakay sa iyang motorsiklo ug gisundan ang suspek nga padulong naglakaw sa Kamagong. Sa dihang nakit-an ni Solon ang suspek nga si Carbona gikasahan niya kini og 9mm service firearm.

Apan abtik usab kaayo si Carbona pagkuha og mahait nga hinagiban, apan sa wala pa gihiwa ang liog sa biktima gisukmag una niya kini ug sa dihang natumba ang guwardiya giyak-an niya kini ug giloglog ang liog.

Si Solon daling gidala sa Cebu City Medical Center ug didto na kini mabugtui sa iyang kinabuhi. Si PO2 Michael Codaste sa Homicide Section miingon nga nagtago sa kabalayan si Carbona ug sa dihang migawas na kini wala makabantay nga duna na diay nag-atang daan nga mga estambay sa dapit hinungdan nga nakulatahan kini.

Matud ni Codaste gawas nga giloglog ang liog sa biktima nakaangkon pa gyud kini og samad sa nawong ug ulo nga maoy gituohang nakaingon sa hinanali niining kamatayon.

Ang suspek gibalhog sa detention cell sa Cebu City Police Office (CCPO) ug gipaabot nga pasakaan og kaso. (BANATNEWS)