Pagpangaspalto giandam na

CEBU, Philippines - Gisugdan na sa Cebu City Engineer’s Office ang pagsusi sa nagkadaiyang kadalanan sa Sugbo nga kinahanglang aspaltohon.

Nagkanayon si City Treasurer Ofelia Oliva nga dili pa niya matino kung pila ang magasto sa maong proyekto apan sa pagka-karon aduna pa sila’y P31 milyones apan dugangan pa kini sa higayong mahibaw-an na kung pila ka mga barangay ang makebenipisyo sa maong proyekto.

Ang pag-implementar sa maong proyekto sugdan karong tuiga   hangtod na sa 2013.

Giklaro hinuon ni Oliva nga taud-taod na ang maong plano ug wala kini labot sa barangay election.

“Walay kalabotan ang umaabot nga eleksyon niining proyektoha kay sukad sa una mao na gyud kini unang plano sa atong mayor,” matud pa ni Oliva.

Samtang si Mayor Michael Rama nagkanayon nga ang pag-aspalto sa mga kadalanan maoy taud-taod na niyang pangandoy aron dili na mahasol ang katawhan sa ilang pagbiyahe ilabi na kadtong nahimutang sa mga bukirang barangay.

Gi-target ni Rama nga mahuman kining pagpangaspalto sa kadalanan karong 2013.

Gipaniguro niyang paninduton ang mga kadalanan ning dakbayan aron labing makadani og mga turista. (Gloribee M. Aroma USJ-R ug Sanden J. Anadia) (BANATNEWS)