Retiradong polis, bata patay sa bangga

CEBU, Philippines - Patay ang usa ka retiradong polis ug ang 3-anyos nga batang lalaki human magkabangga ang duha ka motorsiklo kagahapon sa hapon sa sitio Bobon, barangay Poblacion, lungsod sa Pinamungajan.

Si PO1 Rey Bada, duty desk officer sa Pinamungajan Police Station sa pakighinabi sa Banat News kagahapon mibutyag nga wala na makaabot nga buhi sa Pinamungajan District Hospital si SPO4 Benny Teleron Birao, 61, usa ka retiradong polis, residente sa sitio Balobogon, barangay Tajao, Pinamungajan ug ang tulo ka tuig nga bata nga si Clifford Batitay, residente sa sitio Campo, barangay Poblacion sa nahisgutang lungsod.

Matud ni Bada nga si Clifford angkas sa motorsiklo nga gimaneho sa iyang amahan nga si George Batitay, 32, kinsa giingong hubog niadtong higayona.

Base sa imbestigasyon nila ni SPO1 Uldarico Nengasca, PO3 Peter Cuazon, PO3 Delbert Barera ug PO1 Froilan Velasquez nga si SPO4 Birao nagmaneho sa kolor pula nga Aura nga motorsiklo nagtangag sa plakang GN-14007 nagbiyahe diha sa lugar nga nahitaboan paingon ngadto sa barangay Mangato, Pinamungajan.

Samtang si George nagmaneho sa Yamaha STX nga motorsiklo kolor pula usab nga nagtangag sa plakang GR-2586 nagbiyahe sa sugat nga direksiyon gikan sa Aloguinsan paingon ngadto sa dakbayan sa Toledo.

Si George giingong maoy mibangga ngadto sa motorsiklo ni SPO4 Birao hinungdan nga parehong nangatumba sa karsada ang nahisgutang mga sakyanan ug ang mga sakay nangalagpot.

Subay sa imbestigasyon nasayran nga si SPO4 Birao ug Clifford nakaangkon og grabeng kadaot sa ilang mga lawas human kini mangabunal sa karsada ug gituohan nga maoy hinungdan sa ilang kamatayon.

Si George naangol usab kini apan dili grabe ug temporaryong gidetener sa Pinamungajan Police Station.

Si Bada mihulagway nga ang karsada sa lugar nga nahitaboan kurbahoon ug posibleng wala makabantay si George sa iyang nakasugat.

Ang duha ka motorsiklo parehong nangaguba ug naa kini karon sa kustodiya sa kapolisan sa nahisgutang lungsod. (BANATNEWS)