Lalaking nanggakos giluba

CEBU, Philippines - Nabuslot ang tiyan sa usa ka lalaking minyo human kini lubaa sa amigo niyang naglagot kay iyang gigakos ibabaw sa kama sa balay niini didto sa barangay Cantao-an dakbayan sa Naga sa miaging gabii.

Ang biktima mao si Rene Boy Sasan, hingkod, minyo nga taga Lower Magduk, sa maong dakbayan samtang ang suspetsado mao usab si Jiaztin Buena Ventura , 42, minyo nga silingan sa biktima.

Nasayran gikan sa kapolisan nga samtang nahinanok pag-ayo sa pagkatulog ang suspetsado sa iyang higdaanan, kalit kining gidulgan sa biktima unya gigakos og piit kaayo.

Dihang nakamatngon si Ventura, ug nailhan niya si Sasan nga maoy nanggakos kaniya, iya kining gipugos paglaksi ang mga kamot niini apan matud pa wala gyud malangkat ang mga bukton ni Sasan nga naglikos sa lawas ni Ventura.

Sa kalagot sa suspetsado, nataymingan mang may kutsilyo sa iyang tupad gihansakan niya ang tiyan sa biktima hinungdan nga natuhab kini. Mitahan dayon siya sa kapolisan samtang ang biktima gihatod usab ngadto sa Minglanilla District Hospital.  (BANATNEWS)