3 mil punoan sa MJ gilarot

CEBU, Philippines - Tres mil ka fully grown marijuana ang naibot sa kapolisan gikan sa lungsod sa Balamban pasado alas 6 sa miaging gabii sa sitio Liki barangay Magsaysay.

Ang kapolisan sa lungsod sa Balamban pinanguluhan ni Chief Inspector Januario Sario ug kaubanan nakadawat og impormasyon sa usa ka plantasyon sa marijuana sa nahisgustang lugar.

Tungod sa maong impormasyon ila dayun kini nga gi-operasyonan inubanan usab sa mga opisyales sa barangay ug sa lungsod.

Ang tres mil ka fully grown marijuana nga naibot nila gibana-bana nga nagkantidad usab og P750 mil.

Matud pa sa hepe sa kapolisan sa lalawigan sa Sugbo Sr. Supt. Erson Digal nga nakadayeg siya sa kapolisan sa maong lungsod.

Midugang si Digal nga kasamtangan karun nga anaa sa CPPO ang mga marijuana nga naibot sa kapolisan sa Balamban.  (BANATNEWS)