CEBU, Philippines - Mahimong mapasakaan og kaso si Bise Gob. Gregorio Sanchez tungod sa pagpirma og kontrata sa publikasyong Legislative Gavel ang News Bulletin sa Provincial Board sa kantidad nga P771,600 nga gipadagan sa buhatan sa bise gobernador.
Kini tungod kay sigon sa Local Government Code ang bise gobernador walay katungod sa pagrepresentar sa kagamhanan sa lalawigan. Matud pa ni Garcia nga bisan pa og ang pundo alang sa maong news bulletin pagakuhaon gikan sa buhatan sa bise gobernador apan ang kontrata niini gikinahanglan nga aprobado sa gobernador.
Tungod niini, ang gobernadora mitumbok nga ang kagamhanan dili obligado nga mobayad sa maong kontrata alang sa Legislative Gavel ni Sanchez. Giingong walay gipirmahang kontrata ang gobernador sa maong publikasyon.
Samtang sa iyang bahin, si 2nd district Congressman Pablo Garcia miingon nga ang maong kontrata nga gipirmahan ni Sanchez dili "binding" sa probinsiya sanglit dili man ang gobernadora ang nakapirma niini.
Sumala pa ni Pablo Garcia, ang amahan ni Gov. Gwen Garcia, nga dili gyud mapugos ang lalawigan sa pagpabayad sa publication sa Legislative Gavel ug si Sanchez maoy makabayad niini tungod kay siya man ang nagpirma sa kontrata.
Si Gov. Garcia midugang nga ang bugtong magazine sa probinsiya mao lamang ang "Sugbu" ug wala nay lain pa nga gastohan sa Kapitolyo.
Samtang si 3rd district Congressman Pablo John Garcia mitambag ngadto sa mga unom ka mga personnel sa Legislative Gavel apil na ang editor-in-chief nga mopasaka og kaso kang Sanchez kun buot kining makapaningil og sweldo ug dili ang kagamhanan sa probinsiya. (BANATNEWS)