Gubat kontra Dengue gilusad

CEBU, Philippines - Gilusad sa kagamhanan sa dakbayan sa Sugbo ang Dengue Education Awareness and Reduction Program samtang gipahingusgan sa lalawigan ang kampanya batok niini partikular ang sa dakbayan sa Toledo.

Si Mayor Michael Rama nagkanayon nga miabot na kapin sa 1,000 ka kaso ang gi-dengue sa dakbayan sukad sa Hunyo hangtud sa Agosto.

“Akong awhagon ang katawhan nga magsugod gyud sa kaugalingon nato nga panimalay ang paglikay sa dengue, busa kanunay gyud ta nga manglimpiyo sa atong palibot ,” nagkanayon ang mayor.

 Apan ang hospital chief sa Cebu City Medical Center nga si Myrna Go mibutyag nga 28 ka mga pasyente nga dunay dengue ang naa karon sa CCMC ug nagkaminos na kini gumikan sa pagsige nila og kampanya aron malikayan ang maong sakit.

Nasayran nga dugangan og P10 milyones ang budget alang sa kampanya batok sa dengue, P6 milyones niini ipamalit og mga gamit sa tambalanan samtang ang laing P4 milyones himuong standby money sa higayon nga mosaka pa ang kaso sa maong sakit.

Usa sa reklamo nga nadawat sa maong CCMC mao ang pagdaghan sa mga pasyente sa nagkalain-laing sakit hinungdan nga dunay mga higayon nga maghuot kini sa lawak.

Miabot sa 30 ngadto sa 40 porsyento sa kasamtangang mga pasyente sa CCMC ang dili mga residente sa dakbayan hinungdan nga nagpadayon ang paghuot sa mga tawo sa maong tambalanan

Nagtinguha si Gob. Gwendolyn Garcia nga matutukan sa Anti-Dengue Task Force ang dakbayan sa Toledo tungod kay kini maoy labing daghang mga kaso sa dengue gikan sa bulan sa Enero hangtud sa bulan   sa Agosto ning tuiga.Ang Toledo may 99 ka mga kaso, gisundan sa Talisay 89, Danao City 88, Balamban 86, Minglanilla 61, Asturias 53, Bogo ug Daanbantayan pulos may 41 ka kaso, Liloan 40, Argao 38, ug Medillen 37 ka kaso.

Ang kagamhanan sa lalawigan sa Sugbu migahin og P2 milyones aron ipalit og upat ka mga blowers ug kemikal aron pagpatay sa mga lamok.  

Giklaru hinuon sa Department of Health kon DOH-7 nga dili pa alarming ang kaso sa dengue dinhi sa Sugbo ug tibuok Central Visayas.

Matud ni DOH-7 director Sussana Maderieta dunay mga lugar nga gipaubos sa hot spots apan wala pay gideklarar nga outbreak sukwahi sa mga silingang rehiyon nga duna nay gideklarar nga pandemic.

Subay sa ilang monitoring nagpangidaron og 6-anyos ngadto sa 10-anyos ang sagad sa natakboyan karun sa dengue, usa ka bulan ang labing bata ug 18-anyos ang labing gulang nga nataptan niini.

Gipasabot ni Maderieta nga ang siyudad sa Sugbo mao gyud ang kanunay nga nag-una sa dunay labing daghang kaso sa dengue sa tibuok rehiyon matag tuig gumikan kay usa man kini ka highly urbanized city ug nagpunsisok ang mga molupyo.

Sayo niini gipadayag ni Dr. Eric Tayag sa Department of Health National Epidemiology Surveillance Unit pagkakarun niabot na og subra 50 mil ang mga kaso sa dengue sa rehiyon ug napanglantawan nga mosaka pa kini ngadto sa 80 mil sa pagtapos karung tuiga.(Uban sa report nila ni Sanden Anadia ug Zappora Duria, PIT) (BANATNEWS)