Gipalusot nga kahoy nasakmit

CEBU, Philippines - Mikabat ngadto sa 293 ka mga tablon sa kahoy nga Lawaan ang gisakmit sa kapolisan sa Sibonga niadtong Biyernes sa gabii diha sa barangay Bahay lungsod sa Sibonga nga gidudahang gikan pa sa Surigao didto sa Mindanao.

Si PO3 Franklin Gako sa Sibonga Police Station sa pakighinabi niini sa Banat News kagahapon nagkanayon nga mokabat ngadto sa 4,731.31 board feet ang maong kahoy apan wala pa nila matino kun pilay kantidad niini karon.

Sumala pa niini base sa natala sa ilang police blotter nga ang maong mga kahoy gikarga sa usa ka dakong pumpboat nga gikan sa Surigao nga giingong dad-on sa usa ka Jamaica Lumber nga nahimutang sa barangay Poblacion, Sibonga.

Usa ka concerned citizen ang nanawag diha sa Sibonga Police Station ug mi-report kabahin sa shipment sa maong mga kahoy.

Ang hepe sa Sibonga Police Station nga si Inspector Alan Madrid Rosario uban nila ni SPO4 Rodelito Carillo, PO2 Dandie Mulo, PO2 Roque Senerillas ug PO2 Fernando Fernan ang daling miresponde sa maong report ug maoy misakmit sa nahisgutang mga kahoy.

Matud ni Gako nga pag-abot ngadto sa lugar usa ka bata lang ang ilang naabtan nga giingong maoy gibilin pagbantay niini ug mao usab kini ang mipakita sa mga dokumento sa maong bangka. Nasuta sa mga polis nga expired na ang permit to transport sa maong pumpboat ug gikatahong wala usab kini pangalan.

Ang Banat News maoy usa sa nakadawat og text message kabahin sa maong kargamento susama usab sa nadawat sa ubang tigbalita apan walay klarong detalye ang nakabutang sa maong mensahe gawas lang nga adunay shipment sa kahoy nga gisikop ang kapolisan sa maong lungsod.

Matud usab ni Gako nga walay nakasuwat nga pangalan nga tag-iya sa bangka diha sa ilang blotter ug wala usab ibutang kun gidala ba sa mga polis ang bata diha sa ilang buhatan.

Ang nahisgutang mga kahoy gitugyan na sa mga polis ngadto sa buhatan sa Community Environment and Natural Resources (CENRO) sa Department of Environment and Natural Resources, Region-7.  (BANATNEWS)