Bayaw namusil gipangita

CEBU, Philippines - Padayong gipangita sa kapolisan ang bayaw nga nakapusil sa bana sa iyang igsuon nga babaye nga iyang gikaaway didto sa Upper Tunghaan, lungsod sa Minglanilla niadtong Huwebes sa alas 11:20 sa gabii.

Ang biktima mao si Dominador Magno, 32, samtang ang suspek mao si Jeorame Canoneo, molupyo sa barangay Bulacao, siyudad sa Sugbo ug igsuon sa asawa sa biktima.

Matud ni SPO2 Roberto Canencia sa Minglanilla Police Station sa dihang nahinabi sa Banat News subay sa inisyal nga imbistigasiyon ang biktima ug suspek dugay nang nagkasungi kabahin sa problema sa pamilya.

Subay sa inisyal nga imbestigasiyon nga samtang naglakaw ang biktima paingon na untang mopauli giatngan kini sa dalan ug sa walay daghang pangutana kalit gipusil gamit ang wala matinong kalibre sa armas.

Ang biktima naigo sa baba ug daling nakasibat ang suspek pahilayo ug padayon pa karong gipangita sa kapolisan.

Samtang ang biktima daling gihatod sa Minglanilla District Hospital apan gibalhin kini sa tambalanan sa dakbayan sa Sugbo alang sa dugang medikasyon.

Dugang nahipos nga impormasyon sa kapolisan, ang biktima nagplano kini nga makigkita sa suspek aron sa pagpangayo og pasaylo apan kalit lang kining giatngan ug gipusil sa suspek.  – BANAT NEWS