Bala mipilit sa agtang

CEBU, Philippines - Mipilit ang bala sa agtang sa mekaniko nga gipusil sa miaging kaadlawon sa wala mailhing lalaki sa dalan Maximo Patalinjug Avenue sa barangay Pajo, dakbayan sa Lapulapu.

Ang biktima mao si Joel Sumbal, 30, minyo, nga taga sitio Cadulang, barangay Marigondon, dakbayan sa Lapulapu.

Ang nagpusil mao ang kuyog sa unom ka mga lalaki nga gikang nag-inom sa KTV bar sa nahisgutang dapit.

Si PO1 Jonard Cinco sa Homicide Section sa kapolisan sa maong dakbayan nga nahinabi sa Banat News miingon nga kuyog sa biktima iyang mga kauban sa trabaho nga nag-inom sa usa ka KTV bar sa nahisgotang dapit.

Matud pa ni PO1 Cinco nga hubog na ang biktima nga gidala sa mga kauban sa paggawas sa nahisgotang KTV bar ug nagpunay kini og panghagit sa grupo sa unom ka mga lalaki nga gikan nga nag-inom sa nahisgotang bar.

Sa dihang padulong na nga gipasakay sa traysikol ang biktima ang usa sa unom ka mga lalaking gihagit sa biktima miduol niini ug midul-it sa armas ngadto sa agtang niini.

Human sa maong pagpamusil, ang unom ka lalaki naglumba sa pagpanagan pahilayo sa maong dapit ug ang biktima nga dad-on na unta pauli sa ilang panimalay gihatod na lang sa Mactan Doctor’s Hospital.

Dugang pa ni PO1 Cinco nga adunay talagsaong suwerte pa ang biktima kay wala molapos sa agtang ang bala ug buhi kini apan padayon pa nga giatiman sa mga doktor. – BANAT NEWS