Kapalpakan sa hostage taking gibutyag

CEBU, Philippines - Imbestigasyon sa napalpak nga hostage rescue niadtong Agosto 23 daghang nakit-ang kasaypanan sumala pa sa panel nga nag-imbestigar niini.

Kagahapon, si Department of the Interior and Local Government undersecretary Ric Puno kansang buhatan maoy naghawid sa Philippine National Police maoy usa sa gigisa og maayo sa panel.

Si Puno miangkon nga nagkulang gyud ang PNP sa crowd control, nagkulang sila sa pagkontrol sa media ug ang kakulangon sa kapolisan sa tukmang mga ekipo aron ma-assault ang maong bus nga diin gi-hostage ang 15 ka mga turistang taga Hong Kong sa gitaktak nga si kanhi Sr. Insp. Rolando Mendoza.

Siyam lakip na ang hostage taker ang nakalas sa maong insidente. Kini miresulta sa mga pagsaway dili lang dinhi sa nasud kundili lakip na sa gobiyerno sa Hong Kong ug China.

Si Puno sa report sa ABS-CBN News miangkong wala siya mabansay sa hostage situations ug nagsalig lamang siya sa mga pangulo sa local crisis management committee nga gilangkoban ni Manila Mayor Alfredo Lim, Vice Mayor Isko Moreno, Chief Supt. Rodolfo Magtibay ug uban pa.

Lakip sa gipatawag mao sila si Puno, Philippine National Police (PNP) Director-General Jesus Verzosa, National Capital Region Police Office Chief Leocadio Santiago, pangulo sa Manila Police District,Chief Superintendent Rodolfo Magtibay, Manila Mayor Alfredo Lim, Manila Vice Mayor Isko Moreno ug ang duha ka hostage negotiators, Superintendent Orlando Yebra ug Chief Inspector Romeo Salvador.

Base sa mga gipakitang senyales ni Mendoza masaligon ang mga negosyador nga maluwas ang mga hostages ug lakip na mismo ang hostage taker.

Si Mendoza midemandang mabalik siya sa serbisyo. Sumala pang Puno pipila lamang ka minutos sa wala pa magsugod ang buto-buto sa sulod sa bus gipirmahan na ni NCRPO director Santiago ang pagpabalik kang Mendoza sa pagkapolis. Apan wala na kini makaabot sa mga kamot ni Mendoza gumikan kay gisugdan na niini pagpamusil ang mga hostages.

Nasuta usab nga si Magtibay duha ang gihuptang posisyon sa komitiba, siya maoy ground commander ug ingon man miyembro usab siya sa crisis management committee (CMC) maong dihang nagsugod ang buto-buto wala siya sa scene kay mitambong sa komperensya sa CMC sa usa ka restaurant duol sa Rizal Park.

Matud pa niini nga ang labing maayong tropa nga Special Action Force sa PNP ug ang Special Operations Group sa Armed Forces of the Philippines naka-estambay lang sa scene ug nagpaabot nga tawgon sa MPD-SWAT. Gikan sa Wires