2 porter gipamusil

CEBU, Philippines - Gipamusil ang duha ka mga kargador sa wala mailhing tawo nga luwan og motorsiklo samtang ang duha nagduwa og baraha sa miaging gabii diha sa dalan Jakosalem St,. eskina M.C Briones St,. barangay Sto. Niño ning siyudad.

Ang mga biktima mao sila si Tomas Sanchez ,41, taga sitio Bato, Ermita ug Vincent Cabilida, 21, taga dalan Jakosalem St,. barangay Sto. Niño. Ang duha pulos porter sa JP Lines.

Sumala pa sa imbestigasyon ni SPO4 Alex Dacua ug mga kaubanan sa Homicide Section nagduwa og tong-its ang duha daplin sa dalan sa maong lugar dihang kalit silang giduol sa wala mailhing tawo ug gipamusil.

Si Sanchez nahiagom og samad pinusilan sa dughan samtang si Cabalida nahiagom og nagkadaiyang samad pinusilan sa iyang kalawasan ug parehong gihatud sa Cebu City Medical Center (CCMC) sa mga niresponding sakop sa Special Weapons and Tactics (SWAT) ug Mobile Patrol Group (MPG).

Nakuha sa kapulisan sa crime scene ang unom ka kabhang sa .45 nga kalibre sa armas, duha ka fragments, usa ka wala pa matinong slug ug duha ka deformed slugs.

Ang mga sakop sa Barangay Intelligence Network (BIN) pinangulohan ni Ronaldo Turia nga usa ka traffic enforcer nakasigpat sa usa ka Rudito Branzuela duol sa crime scene nga armado hinungdan ilaha kining gidakop human nakuhaan og usa ka .45 nga kalibre sa armas nga may buhing bala ug gidala sa Investigation and Detective Management Branch (IDMB) sa Cebu City Police Office (CCPO).

Si Branzuela gipaubos sa interogasyon ug paraffin test sa kapulisan kinsa kasamtangan gibalhog sa detention cell sa CCPO.

Sa gihimong follow-up sa Banat News pinaagi ni SPO2 Jay Yballe nga wala gi-identify si Branzuela sa duha ka mga biktima. – BANAT NEWS