Warden CPDRC gitangtang

CEBU, Philippines -  Hingpit nang nahulipan sa iyang katungdanan ang warden sa Cebu Provincial Detention and Rehabilitation Center (CPDRC) sa barangay Kalunasan ning siyudad sa Sugbu sugod kagahapong adlawa.

Si Gob. Gwendolyn Garcia nagkanayon nga si CPDRC warden Alito Gabuya gihulipan ni Aljer Comendador, kinsa nahimong acting warden sa CPDRC sa wala pa makalingkod si Gabuya. Nakalingkod usab isip assistant warden nga si Reynaldo Pepito usa sa mga opisyales sa CPDRC.Gipahibawo ni Garcia nga si Gabuya gibalhin una ngadto sa Civil Security Unit kon CSU sa Kapitolyo ug magpabilin sa maong puwesto hangtud nga mahuman ang imbestigasyon kalabot sa pagkamatay ni Angelito Cabalquinto ug ang pagkabun-og ni Benjie Undit human kulataha sa kaubang mga piniriso.

Ang gobernadora sa sayo pa misalikway sa sugyot nga ipaubos si Gabuya sa preventive suspension samtang nag-imbestigar pa ang mga miyembro sa Committee on Investigation and Discipline nga gipangulohan ni Atty. Lito Astelliro nunot sa pagpamakak ni Gabuya sa tinuoray nga hinungdan sa kamatayon ni Cabalquinto ug pagtago sa pagkabun-og kang Undit. – BANAT NEWS