CEBU, Philippines - Nagtingkagol sa Talisay City detention cell ang usa ka construction worker nga gipasanginlang milugos sa usa ka 14-anyos nga batang babaye niadtong Martes sa gabii diha sa usa sa mga barangay sa dakbayan sa Talisay.
Ang suspetsado nga si Carlos Heromo, taga barangay Pakigne, lungsod sa Minglanilla mihimakak hinuon ngadto sa mga polis nga iyang gilugos ang dalagita.
Ang biktima uban sa iyang inahan ug usa sa mga konsehal sa barangay nga mi-report ngadto sa mga polis sa Talisay City Police Station sa barangay Poblacion niadtong Miyerkules sa buntag.
Si Heromo gisikop dayon nilang Insp. Diosdado Malazarte, Insp. Jose Nilo Abello, mga opisyal nga ubos sa Field Training Program (FTP) ug PO1 Rosauro Pansumala.
Ang biktima nga nahinabi sa Banat News kagahapon mibutyag nga sa wala pa mahitabo ang insidente gikan siya mitan-aw og TV sa ilang silingan ug human niya og tan-aw mihapit siya og lingkod sa lingkuranan sa duol diin si Heromo kinsa giingong hubog ug nagbitbit og bino mitapad kaniya og lingkod.
Ang balay nga gi-construct diin si Heromo nagtrabaho maagian paingon sa balay sa biktima.
Sa dihang paingon nang mipauli ang biktima, nahiagi kini sa nahisgutang balay ug gitawag ni Heromo kay dunay tuyo.
Matud sa biktima miduol siya kang Heromo apan wala niya damhang bunloton siya niini paingon sa sulod sa balay dayon gi-lock ang gate ug gipugos siya og pasulod sa kwarto diin ang suspetsado magkatulganan.
Gibutyag sa minor de edad nga gihulga siya ni Heromo nga patyon kun mosinggit ug mosumbong ngadto sa iyang inahan sa gibuhat niini.
Ang inahan sa biktima nga nahinabi usab sa Banat News mibutyag nga nianang pagkasunod adlaw nahibulong siya sa iyang anak nga sayo kaayo kining mimata ug nanglimpiyo diin nabantayan niya kini nga dunay “kiss mark” sa liog.
Ang inahan sa biktima nagkanayon nga natahap siya nga dunay nahitabo o gibuhat ang iyang anak hinungdan nga iya kining gipugos pagpatug-an.
Ang bata giingong nagpunay na lang og hilak ug wala na mokaon hangtod napugos pagtug-an ug nagkurog sa kahadlok.
Kagahapon sa buntag gikatakda ang pagpasaka og kasong pagpanlugos batok kang Heromo diha sa Talisay City Prosecutor’s Office. – BANAT NEWS