Kapitolyo motabang sa nabiktima sa baha

CEBU, Philippines - Ang kagamhanan sa lalawigan sa Sugbo mohatag usab og financial assistance ngadto sa duha ka mga bata nga namatay human kini maanod sa baha didto sa barangay Cogon, dakbayan sa Naga, niadtong Domingo.

Matud pa ni Gobernador Gwen Garcia nga ang naandan nga P5 mil nga hinabang ngadto sa matag usa sa biktima sa pamilyang Paran itunol sa Kapitolyo karong semanaha.

Si Garcia nagkanayon nga iya nang gimandoan ang Provincial Social Welfare officer nga hikayon ang tanang papeles aron mapagawas ang maong pundo alang sa pamilyang Paran nga nagpuyo sa West Poblacion siyudad sa Naga.

Nasayran nga niadto pang Martes sa buntag hipalgi ang patay’ng lawas ni Reniel Paran, 8 , sa mga mangingisda sa isla Kwaming, sakop sa kadagatan sa Bohol, samtang ang magulang niini nga si Cris, 9 , didto hipalgi sa lungsod sa Minglanilla niadtong Lunes.

Gitataw usab ni Garcia nga dili siya kapugong sa operasyon sa usa ka quarry sa barangay Cogon sa maong dakbayan tungod kay ang naghatag og quarry permit, dili man ang Provincial Environment and Natural Resources Office ( PENRO) kun dili ang Mines and GeoSciences Bureau ( MGB) sa Department of Environment and Natural Resources (DENR).

Iya hinuong gitataw nga andam siyang motabang kang Mayor Valdemar Chiong sa Naga City pinaagi sa pagpatawag og tigum sa mga opisyales sa maong lugar, nga ilakip ang tag-iya sa kompanya nga nag-quarry ug ang mga nanimuyo aron mapangitaan og pamaagi nga dili na masubli pa ang maong insidente. (BANAT)