Konduktor giluba sa pasahero

CEBU, Philippines - Natuhab ang dughan sa usa ka konduktor sa jeep pasaheroan human kini lubaa sa iyang pasahero nga wala hiilhi didto sa eskina sa mga dalan D. Jakosalem ug Colon , barangay Kamagayan ning dakbayan sa Sugbo sa miaging gabii.

Ang biktima nailhang si Teodoro Sobrio Montefalcon, 21, ulitawo, konduktor sa PUJ nga nagbiyahian sa Inayawan.

Sumala sa kapolisan nga samtang nangolekta sa plete ang biktima   ngadto sa kriminal, namatikdan niini nga kuwang og P2 ang giplete   sa naulahi busa iya kining gisingil sa kuwang.

Apan matud pa sa mga nakasaksi nga imbis P2 ang itunol ang kutsilyo man hinuoy giduslak ngadto sa walang bahin sa dughan sa biktima.

Human makaluba, nanaog usab dayon ang kriminal  ug misibat dayon, samtang gihatod dayon sa drayber sa jeep ang biktima ngadto sa Cebu City Medical Center.

May katahap ang kapolisan nga dumot ang hinungdan sa maong hitabo.   (BANAT)