English Bill ni Gullas gidayeg

CEBU, Philippines - Gihangop ni Bise Mayor Joy Augustos Young sa dakbayan sa Sugbo ang giduso nga House Bill ni Kongresista Eduardo R. Gullas sa unang distrito sa lalawigan sa Sugbo nga ipatudlo gyud ang pinulongang English sa mga tulunghaan sa nasud.

Kini ang gitawag nga English Bill kon “Strengthening and Enhancing the Use of English as a Medium of Instruction in Philippines Schools Act”.

Matud pa ni Young nga angayan gyud kining suportahan sa ubang mga kongresista   sanglit makahatag kini og dakong kahigayonan sa mga Filipino sa pag-angkon og mga nindot nga trabaho.

Giawhag usab ni Young sa mga ginikanan nga kinahanglan nga   pa-eskwelahon gyud ang ilang gagmay’ng mga anak sa nursery, day care o ba kaha kinder aron sila maandam sa pagtungha sa magkataas nga ang-ang sa eskuylahan ug makaangkon og dakong kalidad sa edukasyon.

“Dunay mga pagtuon nga gikan sa unang unom ka tuig sa bata , dali ra kaayo sila maka-absorb sa mga impormasyon nga itudlo kanila, busa importante nga paeskwelahon gyud sa mga ginikanan ang ilang mga anak,” nagkanayon ang bise mayor.

Dugang pa niya nga mahimong instrumento ang pinulongang English sa sayon nga pakighinabi sa mga turista nga moduaw sa atong dapit. (BANAT)