Bugas, sardinas pasiuna lamang - Garcia

CEBU, Philippines - Kusganong gipanghimakak ni Gob. Gwendolyn Garcia ang migawas nga report nga bugas ug sardinas lamang ang ihatag sa Kapitolyo ngadto sa bata nga miuli sa nakit-ang P50 mil   nga kwarta sa Badian niadtong miaging Huwebes.

Matud pa ni Garcia nga ang usa ka sakong bugas ug usa ka karton nga sardinas lang ang ihatag nila isip pahalipay sa 9-anyos nga si Kathlene Taypin, Grade 3 pupil sa Malhiao Elementary School sa lungsod sa Badian pasiuna lamang kadto.

Kini tungod kay gisusi pa man sa buhatan sa Provincial Social Welfare Officer ang kahimtang sa pamilya ni Taypin sa lungsod sa Badian.

Matud pa sa gobernadora nga gawas sa usa ka sakong bugas ug usa ka karton nga sardinas, ang iyang buhatan mohatag usab og P10 mil nga cash ug ingon man Governors Citation tungod sa pagkamatinud-anon sa maong bata sa pag-uli sa dakong kantidad ngadto sa kapolisan.

Nasuta nga kabahin ang maong P50 mil sa gibana-banang P2 milyones nga nasakiyo sa mga kawatan gikan sa maong resort.  (BANAT)