Seguridad sa Sugbu gidayeg sa Indon amb.

CEBU, Philippines - Sa wala pa mogikan kagahapon balik sa ilang mga nasud ang mga ambassador nga mibisita sa Charter Day Celebration sa dakbayan sa Mandaue niadtong adlaw nga Lunes, mi- courtesy call una sila ngadto kang Gob. Gwendolyn Garcia sa Kapitolyo.

Ang mga delegasyon sa mga ambassador gipangulohan ni Hos Serythonh sa Cambodia, Kristiarto Legowo sa Indonesia, Mohsin Razi sa Pakistan, Nawalage Bennet Cooray sa Sri Lanka, Wadde Al-Batti sa nasud sa Iraq. Apil na usab niini ang mga ambassador sa nasud sa Vietnam, Venezuela, ug Angola.

Sumala pa ni ambassador Legowo sa nasud sa Indonesia nga nakita nila ang dakong kalainan sa kahapsay ug kalinaw dinhi sa Sugbu ug sa Manila.

Matud pa niini nga ilang gidayeg ang kamaabiabihon ug sa pagkamaayong tawo sa mga Sugbuanon nga lahi ra kaayo sa Manila. Iyang gitataw nga silang mga ambassador dako kaayo og kompiyansa dinhi sa Sugbu human makita sa gipanghimo sa gobernadora sa lalawigan gikan sa pagpalig-on sa seguridad hangtud na sa mga proyekto alang sa kalamboan partikular na sa natad sa turismo. Sila nagtuo nga dili maapektohan ang turismo sa Sugbu sa nahitabong hostage crisis sa Manila diin walo ka mga langyaw nga turista gikan sa Hongkong ang napatay sa hostage taker nga si kanhi Sr. Insp. Rolando Mendoza. Si Mendoza napatay usab sa maong operasyon.

Gani gitataw ni Legowo nga ang uban kanila naglaraw karon nga mumugna og kasabutan aron mamahimong sister province sa lalawigan sa Sugbu ilawom sa pamunoan ni Garcia.

Si Garcia sa iyang bahin nagkanayon nga nalipay siya sa nahimong reaksyon sa mga ambassador ilabi na nga mipakita sila og dakong interes pagbalik dinhi sa Sugbu ug makigkaalyado pa sa Kapitolyo alang sa umaabot pang mga kalihukan. (BANAT)