P18 usbaw sugod na: RTWPB-7

CEBU, Philippines - Mo-epekto na sugod karong adlawa ang bag-ong wage order pagpatuman sa P18 nga usbaw sa suholan alang sa mga mamumuo dinhi sa Central Visayas.

Mao kini gipahibalo ni Department of Labor and Employment (DOLE-7) director ug chairman sa Regional Tripartite Wages and Productivity Board (RTWPB-7) Elias Cayanong.

Kini human pormal nga napupos kagahapong adlawa ang 15 ka adlaw human sa pagpublikar sa bag-ong wage order nga gisugdan niadtong petsa 16 sa milabay’ng bulan sa Agosto.

Hinuon gipasabot ni Cayanong nga matagamtam na sa mga mamumuo ang usbaw sa suholan sa pagdawat sa suweldo niini sa pagka petsa 15 ning bulana.

Nunot niini, giawhag ni Cayanong ang mga mamumuo pagsumbong sa ilang buhatan batok niadtong mga kompaniya nga padayong magdumili pagpatuman sa bag-ong wage order. Tungod sa bag-ong wage order ang P267 nga minimum nga suholan mahimo nang tag P285 sugod karong adlawa. (BANAT)