Mga tulisan sa Talisay gipanid-an

CEBU, Philippines - Ang kapolisan sa dakbayan sa Talisay may gipanid-an nang suspetsado sa pagpanulis sa Yul General Merchandise sa barangay Pooc, sa maong dakbayan sa milabay’ng semana.

Si Superintendent Henry Biñas hepe sa Talisay City Police Station sa pakighinabi sa Banat News kagahapon wala mobutyag sa mga ngalan niini.

Matud ni Biñas nga usa sa unom ka suspetsadong tulisan nga mitulis kang Yul Julia, taga lungsod sa Minglanilla apan ang lima taga Talisay ra kinsa gituohang wala pa karon makagawas sa Sugbo.

Kahinumdoman nga niadtong milabay’ng semana unom ka wala hiilhing lalaki nga nagsakay og tulo ka motorsiklo nga pulos kolor itom miadto sa tindahan ni Julia ug nagpaila nga mga kostumer.

Duha sa maong mga lalaki nagpabilin diha sa gawas sa tindahan isip look-out ug nagbantay sa gwardiya.

Ang upat niini maoy misulod ug miduol sa kahera ug ila kining gitionan og armas de fuego .

Gumikan sa kahadlok nga pusilon siya, gitunol sa kahera ang P1,500 nga kwarta .

Unya ang maong mga tulisan miadto sa buhatan ni Julia kinsa niadtong higayona nakabantay na ug gipalong niini ang suga diha sa iyang opisina.

Dihang duol na ang mga tulisan gipamusil kini ni Julia pinaagi sa iyang .45 kalibre nga pistola nga lisensiyado.

Usa sa maong mga tulisan ang naigo ug natumba ug gitabangan og bayong sa iyang mga kauban paingon ngadto sa gawas.

Apan duha sa mga tulisan mibawos og pusil apan si Julia nakasalipod sa iyang kabinet sulod sa iyang buhatan busa wala siya maigo sa mga bala.

Napunit sa mga polis gikan sa lugar nga nahitaboan ang tulo ka kabhang sa bala sa kalibre .45 nga pistola, duha, ka kalibre 9mm, ug usa ka slug sa kalibre .45 nga pistola.

Si Biñas midugang nga ilang gituohan nga wala dad-a og hospital ang angol sa kabalaka nga masakpan sila.

Ang mga tambalanan sa Talisay ug silingang lungsod ug dakbayan gisubay sa mga polis apan wala silay nasuta nga tawong napusilan. (BANAT)